Ka phawk hi.

Phawk kik sing e. Ka lungsungah zanni mah-a thupiang tawh kibang den si e maw. Ka sinlai ah hong phawng kikkik den e.

Tuani pen Chirstmas atunma ni/Christmas Tunkimni (Christmas Eve) zan hi-a, midang te mah bangin kei zong huntawp leh hunbei kuan-in Christmas vanleihun ah vanlei-a (shopping) ka pailai tak a hihi. Huihvot anun hiauhiauna lampi dung zui-in ka paisuk hialhial a, niinbung agol simpian khat leh taih innpi khat te kikaal pan in, aw-heu liang-a akhuh chialchial awging khat ka za kha citciat hi. Tua niinbung omna lam manawh-in ka pai phei ciang-in, akhualum nading-in puansia akeek nengnang tawh akitun niapnuap khangham putekpa ka mu kha hi. Apaatgawp neepnaap leh alui mahmah puantung-silh khat nasilh lai hi. Apumpi khua alum zawh nading-in, tua aniin niapnuap puantungsilh sung ah laidal pawlkhat hong guang-in dimsat phitphet lai hi.

Apheituam te zong tom mahmah a, kikeekgawp lai hi. A savun-khedap (shoes) te zong sialuakisa paatkhia mang ta hi. Akhedap veilam penbang kikeek lua kisa vang manggawp ahihman-in, akhemete kidawk khia zeuzau keei ta hi. Akitunna puanza zong kisialua-in vang manggawp a kikeek gawp lai zen hi. Lamdang sakna tawh mitphialo liang-a ka et leh, tua khangham putekpa in aniin phiatphuat amaaitang tawh kei hong ento kik hi. Amit te mual ta ahihman-in hak sitset zo nawnlo a, mittang langbek haksa-in a en zo bek hi.

Akhualum tuam nading in, akhutzep litletsa in om-a, amah-le-amah damtak in hong kibeng kheuhkheuh hi. Tuniciang dong ka tel zawhloh thu khat om hi. Tua thu pen bang hiam cihleh, “aman ka khut hong leen ding hi”, cih lametna tawh ka khut taklam ka zankhiatna thu ahi hi. Mit tha omlopipi mah in lungdam kohna lahna-in kei hong en kik teitei hi. Akhutte damtak-in hong zankhia a, ka khutte kiptak-in hong leenkip hi. Akhut te na vot dikdek khin ta-a, vot lua ahihman-in aci asate leh avunte zong ligawp (chap) puakkham gawpmang ta hi.

Gawng diingdiang lua aihmanin, aguh-ataangte omzia leh siguipi paizia te bang kimu phial ta hi. Amah pen zawngkhaal-in atha zawmlua ahihmanin adintohnang hamsa-sa lua mahmah hi. Limtak-a adin zawh nading in ka pumpi tung kingam sak a, anungzang lam zong ka veilam-khut tawh ka naang phei kawm lai hi. Akhe tung ah kiptak-a adin zawh theih ciangin, alum vitvit annek-tuidawn te akingah theihna buukmun khat, zong kawmkawm a kong pai hiathiat uh hi. Damtak a kong pai kawmkawm mah un, agil kial lua ahihman-in gilsung aging ngutngut-aging ngawingawi tebang kiza zo phial mawk hi. Lamkiu kawi ah a-om nitaak-an nektheihna ding munkhat nakihong lai ka mu uh hi. Tua inn kongkhaak ah ka lutsuk khit uh ciang-in, an nekawm tui dawnkawm-a ka nihvua ka tuttheihna ding munkhat ah pai-in ka tu phei pah uh hi. Tua sai ah, nasem numei khat hong pai pheipah-a, ka neknop dan tek uh hong dong hi. Aman bang dan deih ding hiam cih theilo ka hihman in, sunglam alum zawh nading in alumvatvat coffee hai nih leh aksa taangciim kuangpi khat ka vaikhak hi.

Coffee haikhat la-a dawn in tualai ah ka tutkawmkawm laitak-in, “Tulaitak adinmun ah bangci bangdan in natung thei mawk hiam aw”, ci-in ka ngaih sun kha zenzen hi. “Amah koi pan hong pai ahi zen tam, kua ii pasal ahi zen tam, amah kua hiam cih zong athei aom mah tam, mikhat peuhpeuh in lunghihmawh-in amah na donkha zen uh tam maw”, ci-in dotna tampitak ka lungsim ngaihsutna ah hong phulkhia daudau keei mawk hi.

Ann aneklai tak ka etet leh, abiang langnih ah angeibang a damdam-in sisan hong teeng kik ta hi. Annek mankhit ciang annekman ka piapah-a, phalbi khuavot silsial huih leh vuuk lakah buknading buukmun zong kawm dingin kong pusuak khia kik uh hi. Gamlapi tung manlo in, tua khangham putekpa in biakinn khat hong mukiau hi. Atung kahtohna kahlei ah haksapipi-a ahong kahto tantan teeiteei a, Baikinn singkongkhaakpi te hong-in alutsuak ka en hithiat hi. Tua kongkhaakpi gei ah tuisiangtho koihna tuikuangpi om a, putekpa in tua tuikuangpi sung ah akhutme te ahong diahsuk-papsuk khitciang-in, akhut tawh singlamteh limlahna dan bawl a, biakpiakna taau lam hong nga-in, zahtakna piakna tawh hong boksuk-in hong bia hi. Adintoh kik theih nading ka va huh-a, biakinn sung tutphah omna lam zuan phei-in ka va tu hithiat uh hi. Putekpa zong hong khuukdin-in, akutte nih hong mattuah tittet a, amitte hong si-in, thu hong ngen pah hi. Amah thunget laitak, akiim-leh-apaam ka et kawikawi leh, midangte’n zong thu na-ngen ziahziah mawk uh a, mi pawl khatte’n neekkhawm na-ne keei uh hi.

Khuaimeivaak te na-kitaangsak-in na kivaak zihziah a, tua khuaimeeivaak te’ ii kiimlehpaam ah a-ommawh mahmah leh akimawl vulvul thei hih huihdam te anung hiauhiauna sung-ah, khuaimeivaak te zong na-phe laplap a, tua huihdam’ anunna zui-in na lam latlat uh hi. Kiimlehpaam-a huih lak ah akihaal gim-namtui te hong nam viauviau ta hi. Naupang lapawlte’ asak hiauhiau uh azaaknop leh akhum ngaungau awging te in lungdamna leh lungnopna tawh ka lungsim hong kidimsak a, ka kha-mitte zong hong vaaksak zo mawk hi. Tuani pen nithupi te laklah athupi phadeuh ni khat hi cih hong phawksak den hi. Tua in ih Topa Jesu naungek-a hong suah lungdamna thu ahi hi. Tua putekpa ka et kik leh adintoh kik nading hamsa sakeei lai ahihman-in, ka pumpi' tung ah kingam sak kawm-in anungzang lam ah ka veilam-khut tawh ka naang phei hi. Ka khut taklam tawh abaan lang khat leen in damtak-in ka domto hi.

Lungnopna leh lungdamna tawh akidim mite ka et kawikawi lai tak, putekpa in ka liangko tung ah alu hong nga suk hithiat hi. Ka et phei leh aman,“lungdam lua ing”, cih agennopna-in hong maaitai kawm-in hong en kik hi. Asawtlo in, huih hong diik nawnlo-a ahu sanna hong bei lam ka phawk kha hi. Daaitak leh lungnuam tak-in a ihmu ta hi. Lungkham-sinkhamna cih te omnawnlo. Khuadamna-khuavotna cih te omnawnlo. Gilkial-dangtaakna cih te omnawnlo. Sinkham-lungbuaina cih te zong omnawnlo a, lungnopna leh daihna bek tawh akidim hi ta hi. Tualai takin siampipa khat ka kiang ah hong pailam ka phawk kha kei liang hi. Siampipa in ka liangko tung ah a khut hong nga-in hong etsuk takciang ka phawk kha panpan hi.

Ka biang ah ka khitui te hong tak kelhkelh a, khitui-naptui tawh kidiik kawmkawm sa-in siampipa ka en to kik hi. Amah (putekpa) ka muh masak lai in, agammangsa leh amangthang kha khat huh-in panpih a, angvan ka kisa kha hi. Himahtaleh, ataktak-in tua dan na hihetlo a, agammang-amangthang kha pen kei mahmah ka hih lam hong kitelsak zaw a, ahong huh ahong panpih ahong phawksak kik pen amah na hizaw gige cih thu ahihi. Hih thu pen zanni mah-a thupiang bangin ka lailung ah hong phawng den mawk e.

Story Credit: L. Wiss

Image Credit: Pinterest

Laitei: Classy Lian

31/01/2020

On Friday