Naupangno Khat’ Upna: Nalamdang bang zah aman hiam?

Sally akici numeino in asanggampa ahi Georgi’ thu tawh kisai anu-le-apa te akihona/akikupna uh a-zakkhak lai in, tua numeino Sally pen kum giat bek na pha pan hi. Anaupa pen acina lua mahmah a, acinatluatna pan hong dam-in anuntak theih nading in ahih zawh zah leh ahih theih khempeuh phial uh hih khin ta uh hi. Tun ahihleh, a manpha mahmah ki-atna/ki-kheina (surgery) bek in amah huh leh damsak zo ding hi na pi’n, a sum-le-paai lamsang enleng cin zolo leh apiang thei ngiatlo thu khat ahi hi. “Tun’n bel nalamdang (miracle) bek in amah damsak zo in cei maw”, ci-in apa’n lungkia leh lamet bei tak-in agen ngeungau thu aza kha hi.

Sally zong alupna inndei sung ah lutphei in, puan koihna (closet) sung-a aseelsim ahi sumtang kholna bung (piggy bank) hong la khiankhian hi. Abung sunga sumtang-sumneen khempeuh sual (floor) tung ah avek-in asingkhiat seuhseuh khitciang in, asum kholsa sumneen aneih teng bang zah pha peuh mah hiam ci-a limtak-in sim ciauciau hi. Akhialh khak ding alau man leh akhial thei ngiatlo ahih man in, thum vei bang sim phapha kik lai zen hi. Asum aphazah atheih tak ciangin, asumtang teng khempeuh khuadam hunsung-a akizang lutang ahihkeileh ngawng ah aki-ok puanthem (cold-weather-kerchief) tawh atun khitciang in, innsaapna inndeituam (apartment) pan apualam hong pusuakkhia khiankhian a, lamkiu kawi ah a-om zatui nam tuamtuam akizuakna sumbuk (drug store) lam hong manawh in hong pai sauhsauh hi. 

Zatui zuakna mun atun ciangin, (pharmacist) zatui zuakte’thudonna angah dong lungduai-sinduai tak-in na ngak ngiungeu hi. Himahtaseleh, tua zatui zuakpa pen kum kua apha panding naupang khat lel ci-a awlmawh manselo liang-in midang khat tawh kiho in na buai keei mawk hi. Tua ahihman in, zatui zuakte’ thudonna angah theihtheih nading in, Sally in akhete sual ah taat kawmkawm-in gingsak sualsual a, kikhuh bawl kawmkawm phial mah taseleh ki-awlmawh tuanlo hi. 

Atawpna ah, puanthem sung ah akoih khinkhian sumneen lakpan 25 cent tang khat hong lakhia in, maan (glass) tawh akibawl sumpiakna sabuai/dawhkan (glass counter) tung khut-ah atawi tua sumtang tawh va beeng (bang) phei giap  ahih man in, zatui zuakpa in tua naupangno hong thudon panpan hi. “Bang deih na hiam”, ci-in tua zatui zuakpa in lungkim mello leh hehna awkam zangh-in hong dong hi. “Awww, ka sanggampa’ thu ong gen nuam hing ee. Ka naupa pen maw dam lua khollo in aci na mahmah aihciang-a nalamdang (miracle) alei nuam hing ee”, ci-in amah adotdan lian in hehna leh lungduailohna awkam pian mah hong zangh-in adawng kik pah hi.

“Bang e, telpak kei sing e. Nalamdang e?”, ci-in tua zatui zuakpa in dong pha kik hi. Naupangno in, “He hi mah. Kapa’n maw, nalamdang bek in amah dam sak zo ding ci hiven. Tua nalamdang na zuak mah hia? Tua nalamdang bang zah aman tam maw?”, ci-in adawng kik hi. Zatui zuakpa in, “Ko maw, tua na cih nalamdang te hih laitak ah zuaklo hi ve ung, naupangno aw. Hong na maisak o maw, ko hong huh zo kei mai nung e.”, ci-in adawng kik hi. Naupangnu zong um pha mello ahih man in, “Ka thugen ong ngaih sak phot dih ve maw. Ken maw tua nalamdang ka leinang sum nei hiveng. Hehpinatawh bang zah aman hiam cih hong gen ta peuh ve maw,” ci-in hong thum ngetngut hi. Tualeh, agei-a limtak-a akithawi leh akizem sa-a ading pasal upa sim pian khat in akihona teng uh azak khit ciangin, awn suk-in tua naupangno kiang ah, “Boih, na sanggampa’n bang dan nalamdang te ki sam ahia?”, ci-in awnemno tawh na dot bawl hi. 

“Thei…thei…thei nawnlo hiveng”, ci-in dawng kik a, “Ka sanggampa aci na lua mahmah aihciang a, zatopi ah akikhei/aki-at ding (operation) kisam cih ka nu’n  hong gen hiven… tua bek thei ing. Aihhang ka nu ka pate’n ka naupa’aki-aat theih nading sum akisam zah nei vetlo e, tua aih ciang a, ka sanggampa’ading in sum kholsa ken nei hiveng.”, ci-in acih kawmkawm-in lainatna luankhi te abiang tungah hong tak khia kelhkelh hi. 

Tua akithawi sitset papi uhampa in, “Boih, tualeh nang sum bang zah nei na hia?”, ci-in adot tak ciang in, naupangno Sally in, “Ken maw dollar 1 leh  11 cents bang nei hiveng, leitung ah ka sum neih khempeuh hih teng hi pah ei”, ci-in kisathei tak leh lungmuang tak in na dawng phiau hi.

“Aw pha ei leh, na naupa’ading akisam nalamdang i amanzah pen zong dollar 1 leh 11 cents hi pah lian ei. Kituak lian kha in cei”, ci-in maaitai tak in a gen hi. Amah zong naupangno’sum la-a akhut langkhat tawh tawi-in, akhut alang khat ah naupangno’khut len kawm sa-in, “Boih, na omna uh hong pai pih in maw, na sanggampa leh na nu-le-pate munuam ing e.”, ci-in agen hi.

Tua puanhoih tawh akithawi pasal upa simpian pen amin thang vangvang mikhei leh mi-aat lamsang asiam mahmah siavuan (surgeon) Dr. Carlton Armstrong hi-a, asanggampa’damlohna pan adam theih nading in atuam deuh a vaihawm sak-in abawl hi. Zato inn ah ki-aatna (operation) te akhawn khong in leh lawhcing tak in zo thei-a, asawtloin asanggampa pen aci hong dam tektek-in innlum-lolum ah hong zuan kik thei ta hi. 

Anu-le-apa ten zong hih dinmun ciang dong a hong tunsak theih thulela te lungdam tak leh lungnuam takin na ki gengen uh hi. Anu in, “Hih ki-aatna (surgery) pen nalamdang taktak hi mawk mah ei maw. Sum tawh alei ding hileng bang zah tak aman zen mah tam maw”, ci-in amah zakkhop dinglel in phun ciauciau-a apau mualmual hi. Numeino in tua nalamdang bang zah aman lian hiam cih thei leh tel lua ahih man in amahguak na nui sim hieuhiau hi. Amah atheih leh atel thu in Dollar 1.11 leh naupangno khat’upna in nalamdang lei zo sak cih thu ahi hi.

Story Credit: Author Unknown

Lailet: Classy Lian

Image credit: Shutterstock

07/11/2019

Story Credit: @https://www.beliefnet.com/wellness/2000/05/the-faith-of-a-child.aspx#5GQYHAf2JfMhLwRaman