Uiphuk/Ukeeng Lawmta

Uiphuk (Ukeeng) honpite in gamsung nawk-in khual hong zin laitak in, amaulakpan alawm uiphuk te nih dumthukpi sung ah hong kia citciat se uh hi. Uiphuk/ukeeng adang teng zong tua alawmte nih akiatna dum kiim teng ah ahong kiimkot kawikawi vualeh, tua dum athuk luatlam hong tel khia uh ahih manin, alawm uiphuk honpite in suahtak nading lametna khat zong om nawn ken cei ci-in tua dum akia uiphuk nih te tung ah na cihsan mikmek mawk uh hi.

Himahtaseleh, dumkia uiphuk nih te in alawm dangte’ gen thute awlmawh deklo-in, dumsung pan asuahtak theih nading un hanciamtak-in hong diang khiato teitei uh hi. Tua banga hong hanciam tantan tasemahleh dumtung ah a-om uiphuk honpite in, “Bangbang hitaleh tua dumthuk sungpan suaktalo ding veve khawng hanciam kankan nawn se dah mai un. Diangdiang nawn se dah mai vo. Gim lel uh teh”, ci-in nacihsan miau mawk uh hi.

Atawpna-ah, dum sung ah om uiphuk khat zong alawm uiphuk honte agengen thute za-in ngai ahihman-in atawpkhana ah hong lungkia ta a, lei ah puksuk-in hong si ta hi. Anungta lai uiphuk khat pen zong ahihzawhzah mah hanciam-in hong diangto teitei lai zen hi. Dumtung pan uiphuk honpite in, a cih ngei mah bangun, “Khawl tapeuh in, gimlua ta teh. Tuah na lawm pen tawh nasikhawm lel ou”, ci-in na-awtsan ngeingai mawk lai uh hi. Tua anungta lai uiphuk zong atha neihzah tawh hanciamtak-in adiantoh leh tua dumthuk sungpan hong suaktazo mawk zen hi.

Hong suahtak khitciang in alawm uiphik dangteng in,“Dum tung pan kong awtsan ngeingai uh zakha lo maw”, ci-in adot takciang un, asuakta uiphuk pen in, “Kei maw, ka bil in khuaza thei vetlo hiven, atung pan na awt ziahziah uh pen nong thapiakna uh ka sa veleh”, ci-in  limtak-in na dawng phiau hi.

Hih tangthu’ hong hilhthu:

👉 Leii leh kampauna  in nuntaklawhna leh sihlawhna vaang nei hi. Lungkia, thanem leh akhakunkun mite aading hih cibanga hanthotna leh thapiakna kammal te in anuntakna uh hong phongto, hong domto, hong angvaan-in tha hong dimsak thei hi.

👉 Lungkia-a akhakunkun te ading hih ahoihlo kammal in anuntakte uh siatlawh leh beilawh thei lai hi.

Story Credit: Author Unknown

Source: Wealthy Gorilla

Photo Credit: Insider

Lailet: Classy Lian

13/01/2020