Lukhuzal
Tung sunnipi ahong lun-in
Ahong so vingveng a
Kangmei bang
Asat luat ciang
Na banzaal in
Ka' nunna
Hong zalkhia in-la
Asatna pan ahong daal ding-in
Na luzaang tung-ah hong khu in.
Sinlai lung na dam nop ciang
Ka' liim neuno
Hong zong inla
Na khe tawh
Hong siiksan-in
Ka' liimsung-ah hong beel in.
Lailung dam-in
Sibang na nuih nop ciang
Ka' nunna
Zinbang hong liingsak gawp
Hong lokgawp
Hong siinggawp in.
Khasiatna
Haksakna
Lungkiatna
Lungkhamna te thuak-in
Albang dah a
Na lailung zaitha
Patbang hong neem ciang
Na luankhi te
Thulguah bang hong luang a
Guntui bang ahong khan ciang
Na luankhitui te
Paibang nong pomna
Na anglai ah
Hong taak kelhkelh sak in.
Lummei kai nuai ah
Thulguah ahong luan ciang
Na sak duang akawt khakloh nading
Ahong daal ding-in
Ka' nunna
Hong zal khia inla
Na luzaang ah hong khu in.
Hong deih nawnlo-a
Nong zat nop nawn keileh
Ka' nunna
Hong khup
Hong khep inla
Hong sengcip in.
Lukhuzal = umbrella
Liim = shadow
Siiksan = step on
Classylian
23/05/2020
On Saturday
Comments
Post a Comment