#Mim Va Bang Thuumna
Sian aw,
Na anglum tualnuam ah
It leh ngaih
Laizom, ciin leh tuai teng tawh
Nunnuam nga bang leng a
Seino gual momno teng tawh
Phatna zaila
Nau bang awi khawm
Khau bang suut khawm
Nuihciam lel khawm
Holung kum khawm a
Lam bang ka paak khawm lai tak un
Na phuhsa pawlpi
Hong kikhaang-in
Hong kitam ta
Na pumpi
Hong kituancil-in
Hong kisuzan gawp sak dikdek ta e
Kua'n gibang hong khen sese hiam aw?!
Sinlai ah na sa'ng e.
Sian aw,
Amangthang tuu khat bang
Khat tang sawlbang ka hei kul ta
Bang ci lunggel ding ka hiam aw?
Ka tuanglampi
Khim bang hong zin lawh e.
An bang nong it, na tuu te
Lungkia, lungkham
Lailung zaitha pat bang hong nem a
Liangvai-in mang bang ta
Mim bang thum-in taau ngeungeu ung.
Sianmang' laukha aw,
Hong leng inla
Heh hong nem aw
Hong veh in maw
Bang'n gibang hong khen sese hiam aw?!
Sinlai ah na sa'ng e.
Sian aw,
Lailung ka geel geel ciang
Sinlai guu bang hong zen lua
Dipngek hong na sak a
Khasiat suak-in
Luankhi gial bang hong kia ngelhngelh.
Gibang hong kikhenna sinthu
Lel nawnlo aw.
Gibang hong kikhen zong
Sinlai lung ah
Khat leh khat
Hong ki nglih sak ken la
Na deih sinthu
Hong telsiam sak aw.
Sian aw,
Maciang suan ding
Khimkhua hong zing zong
Lametna sunni taang thak
Hong mu sak aw.
Paak bang a vulsa
Ka nunna
Zing nisuak bang-in
Hong thak suaksak inla
Na zing van daitui tawh
Hong no suahsak-in
Hong phong kik in aw.
Sian aw,
Na hoih nate
Nong muhsakna
Na zia leh tong
Nong theih siamsakna
Nuntakna leh ngaihsutna thak
Nong guatna
Hong hi sak zaw in aw.
Classylian
On Sunday
14/06/2020
Image Credit: sciencesource
Comments
Post a Comment