ZOMI TE' PAUNAK

ZOMI TE' PAUNAK

PAUNAK LE A KHIATNA

1. A si masa puantuam tang.
#A masa peuh hampha zaw.

2. Akta mang kuan kitutu.
#Kilemna om kei leh kiamsukna manthatna piang.

3. Akta duhgawl kilawh khuh.
#Huaiham lua leng gimna kingah thei.

4. Aktui sungah a vom ding leh a kang ding kitheilo.
#Mailam thu piang ding kigen-khol theilo.

5. Buipi leikei in zong khua ngai
#Kidawm in gamta ding

6. Bui a phak kuan a tawp.
#Maban tun dektak napi a tut kuan a tawp.

7. Cimnuai a sa kibak, geltui a kithuk.
#Lungdamna mangngilh ngeilo, khatvei teitei thuk kik hamtang.

8. Dektam tuktum zong gal suak thei.
#I muan pen zong gal suakthei.

9. Gallu kihta gallu tuak.
#A haksa khatpeuh utlo a i pelh hang ki tuak veve.

10. Gal phawn kuan leh matut kuan.
#Nasepna khatpeuh ah I zawh kuan ciangin hanciam semsem ding.

11. Gip zong leh khuai zong kituak.
#Deih tuak kikhek.

12. Hakai pahtak lung heng.
#A hoih ding a i upmawh khat a hoihlote.

13. Hausa sial mei let.
#Nasepna ah siksan khit na a sem lelte.

14. Hausa ziak in kuang zawn ban.
# A haua lian khatpeuh hangin a kim a pam a te’n noptuamna ngah.

15. Hawmsiam nungta, nebum si baih.
#Cingh in hawm dimdiam leng nuntak nuam, huaiham in angsung bek gen leng puksi thei.

16. Inn gua hahlo, gam gua hah.
#A u a nau, a khua a tui puahlo a, midang a puah te.

17. Kamsiam sial lei sang, kam sia sial liau.
#Kam siam leng thu sia zong mai thei, kam sia zang leng thu gina lo khat zong kiliau thei.

18. Khaikha a gui-ah gah.
#Mi hoihlo te kigui zuih.

19. Kawl zong tui dam in kiho.
#Zindo lengla do siam

20. Komkim zong ta pasa sagih nei sa nawkik.
#Numeite tanu tapa a kimin a neih hangin kisak theih ngam huailo.

21. Khuapi guahzu satang hal
#Thu khatpeuh a thang vengvang hang a dai baihte.

22. Leiba leh sakha nuai nung.
#Leiba neite kisim mawh.

23. Lamnai tawn nuam behiang kum kua a tunglo.
#A ngeina bang tawnlo in a baih bawl manin haksakna a piang thei thute.

24. Langbawm a ek ah awk.
#I kidawp kei leh eima gamtatna pan gimna kingah kik thei.

25. Lei leh ha zong kipet.
#I it I ngaih pente tawh zong kitawng kha thei.

26. Lusum zong bingtawn a zom
#Thusia sa a hoih ding a lem

27. Meima lo ah tho tu lo
#A omsa thu khat omlo in kigen lo.

28. Meigong lung leh sa zan ta.
#Thu khuallo, hehbaih, lungtom, ngongtat.

29. Mihing leh papo.
#Mihing nuntak hun tom.

30. Mualmong meikhu zong nuam tuam.
#Dahna,lungkhamna, haksatna i tuah laitakin i gei a om mawk khat zong nuamtuam kisa in kingai hi.

31. Mui zang lua kipei sat.
#A kipil sak lua te in tuakkhial baih.

32. Nadak kangin kawl lawh, dai zang kangin kawl peh.
#Mun khat a thu piang khat in mun khempeuh lawh.

33. Ngaltang hapaksa tum kik lo.
#Pasal thu gensa dok kiklo.

34. A nunung gal bansat.
#A lawmte zah in a hat loh hangin lungkia lo in, sem teitei a hih manin hamphatna ngah veve.

35. Nu leh pa thumang a nah lawh pek.
#Nu leh pa thu mangte in thupha ngah.

36. Nupa kilungtuak khua khat in zolo, khua khat kilungtuak khua kua in zolo.
#Kilungtuak a i kithu bup leh kuamah in hong susia zolo.

37. Numei in a ma khuat, sum kuangin a lii khuat.
#Eima mailam nuntakna ding eimah ciatin i hanciam kul.

38. Nahkia kawi in nahkia mam suang.
#Mi gina lo sung pan mi gina khat peuh piang thei.

39. Pa that tokhom guan.
#Thu khual in hehna thukkik pahlo.

40. Pute leh lamsak kineh zolo.
#I pute i simmawh nop hang in kizo ngeilo.

41. Sakhi a pi san a no san
#I nu leh i pate mah kisun ciat.

42. Sakhi in a tatna ding kuam kua khual.
#Mailam thu khualna in kidawm in gamta ding, na khempeuh ah kiguang kuak ding.

43. Sakhi thatlo ngal tang tum.
#A neuna te zo masa lo in, na lianpi a tumte.

44. Sial tat nung a sial dai kai.
#A sia ding teng a siat khitteh, I puah kik hang phattuam nawnlo.

45. Sial nuphal zong sihkuang ah kiliak.
#I lawm i gual luite kimang ngilh ngeilo a hih manin i kimuh kik ciangin nuam kisa.

46. Sial vom leh sial vom ki ngai.
#Eimah tawh a kibang mite kingai.

47. Simbeng zong kim citciat tang zang kiguang.
a. Pilna siamna kikim taleh makai ding khat kiguang tuam.

48. Suangpi suangneu in theek.
#A mah kia a, a lian a hau thei omlo.

49. Tanga si Kawl in kah.
#A beisa a nopna dahna a hong phawkkik sak na. (melmuh)

50. Tu nailo a khe khuang, man nailo a tui sui.
#A hih dingteng zo masa photlo a, a man khinsa bang a omte.

51. Thupha in kong biang kanlo, thusia in mual kua khum.
#Thu hoih thu pha kizel hak, thu sia kizel baih.

52. Va-ak cing kam sakhau taw ah kipua lo.
#A tawntung a kikem, ki galging gigete tungah thusia tung ngeilo.

53. Vai nunung guahsia in lap.
#Sepna bawlna ah a thadah a, a tuantualte hamsatna khatpeuh in lap.

54. Vaphual tang sa, va-ak tang.
#A gina sa mi khat a ma kikep zawhloh man a gina lo a suak kikte.

55. Zawlthu kal ah sial thawl.
#Zawl thu ah thu neuno khat peuh, thu lian suak baih deuh.

56. Zawng nek ngau in thal pu.
#Mikhat gamtat hoihlohna midang khat in thuak lawh.

57. Zawng in a ma kheng mulo in a lawmte kheng ko.
#A ma hoihlohna mulo in a lawmte hoih lohna bekbek a kokote.

58. Zuau in a khap tawn
#Zuau thu i gen leh kisui zuih in kithei kik veve.


Source: NAMKIM BU – Office of Township Education, Tedim

Image Credit: lifehopeandtruth