Lawm le gual, it le ngaih teng tawh Carol Singing pai theih hun lai, zanvak la te sakkhop theih, zan vakkhop theih hunnuamte phawk kikna pan ahong luang khia dan hi ei. Tun bel atam zaw kikhen thaang mang ta mawk e. Athulu bel "Lungzuan Zanvak" ci ni e maw. Tha na piak sak zel dih vo lawmte, lungdam ei😊.
-
Lungzuan Zanvak
++++++++++++++
Huihdam in hong sem siausiau
Meiizun hong kaai zilzial a
Phalbi hunuam
Lungdambawl zong
Tuang hong tung zel ta.
Zan khuamial bikbek sung
Zan gamdaih khipkhep sung
Tung se-al le solkha te zong
Hong taang silsial e.
Hici bang zan gamdaih hun
Hici bang huihdam anun hiauhiau hun
Hici bang thangvan ataan silsial hun.
Tua bang hunte ah
Ciin le tuai
Gualngaih teng tawh
Nuihciam leel khawm a
Lungdamna le lawpluatna tawh
Innkong mai tun sim-in
"Merry Christmas" ci'n
Nakpitak-in awng in
Zanvak zaila te
Guitar te tawh kihual tak-in
Suut khawm ziahziah
Naupang pawlkhat te
Khua-ul luang liang a diang ziahziah
Pawlkhat te kihuang diaidiai
Pawlkhat te khutbeng leklek.
Baangkua sim ah
Lungdamna thu puak
Lungdamna thu pulaak
Lungdamna thu taangko
Hihci bang hunnuam
Lawm le gual
It le ngaih teng tawh
Khuaimeeivaak vaak kawm
Zanvak hunte
Bang hun teh i ngah kik zen tam maw.
Classylian
22/12/2020
Tuesday
Image Credit: shutterstock
Comments
Post a Comment