Awging

Zingkalpha lawmte! 

Lai post loh sawt kik zel ei. Tuni bel Galkapte'n zawhthawh thu tawh i kumpi' ukna le thuneihna hong buluak sakna tawh kizui-in mipite' lungsim pan ahong phul khia kammal te le gamtat luheek ziate ahong suut khia kik poem (leeltong) dan hi ei. Athulu "Awging" cini maw. Asawt lo in, Topa'n gualzawhna hong pia ding hi. Na simsak zel un. Tha na piak sak inla na share sawn sak in maw. Lungdam ei. 

-

🎺 Awging 🥁

🔉📢📯📣🔔

Zingsang khat

Tua zingsang mah in

I zingsang ahi 

I Gam hong kibuluh sak

Hong kibuluak sak miau mawk.

Sunni bang suak-in

Ataang ding kimlai

Khimkhua hong zing kik vat e.

Khuamialpi sung pan

Khanglo in

Khuavak ah

Tho khia ding kithawi lai tak

Paak bang apalh ding kimlai tak

Na khe hong kisaat tuuk zel maw

Meima pawn luite nanawng dam nailo a

Aliam abai a hong kikoih zel maw

Lung in geelgeel ciang

Sinlai ah nasa in

Ka lailung uh dah-in kap ngeungeu e.

Ka sinlai vua meimual te zong

Hong puakkham ta a

Uum le beel te sat ziahziah

Khuang le zaam te tum ziahziah

Thungen ziahziah

Lampi dung teng ah 

Kiko khia ziahziah

Awng khia ziahziah

Lungphona mah nei ziahziah e.

Aww .... 

Lungkhamna le mang batna

Dahna le patauhna

Lainatna le khasiatna

Thuaklahna le haksatna 

Lungsimnatna te

Tua te pen

Hih te pen

Lungsim tawng pan ahong phul khia 

Lungsim tawng pan agingkhia

Awging le aging tuamtuam te hi e.

Hih ahong luangleet 

Gamlumna Awging tuamtuam te in

Kha gilo le kha niin te 

A kilawnthal sak

Dawi gilo le kau gilo te 

Sahawl in hawl a

A lauthawng sak

A hawlkhia zo sak

Hong hisak ta peuh in aw.

Classylian

06/02/2021

Photo credit to original uploader

#TheVoice

#SaveMyanmar

#AgainstMilitaryCoup

#RejectDictatorship

#JusticeForMyanmar

#HearTheVoiceOfMyanmar