Khuakhaltuung (1): Kipat Thakna

Tuni bel Haiku poem lam atloh sawt lua ta ahihcianga, Zomi Haiku khat phauk leuleu ni maw lawmte. Athulu dingin "Khuakhaltuung" cini maw.

"Khuakhaltuung" cih ciangin "khuakhalhun (summer) le tuung (onset, commencement, start, before, earlier)" cih kammal nih te kigawmna pan ahong piangkhia laimal/kammal khat ci-in kila thei hi. Phalbi (winter) aman khit deuh hun le khuakhal atun ma deuh hun kikal sung teng cihnopna ahi hi. Australia Gam-ah "khuakhaltuung" hun pen September, October le November kha sung teng ahi hi. 

Mangkam-in "Spring" cihnopna hi a, Kawlkam-in bel "နွေဦး" kici ziau hi.

-

Khuakhaltuung

****************

Khakunkun nawn ken!

Sunni taangin paak palh ta

Nuntak kipatna!

#Classylian

06/09/2021

Monday

Picture credit: WallpaperAccess

-

Haiku pen
-----------------
Haiku pen (athei nailo te a'ding bek) abeisa kum zalom 17 kiim-in Japan Gam-ah hong kipan khia a, kum zalom 19 atun ciangin hong minthang vangvang ta hi. Tudong mahin kampau tuamtuam tawh, lai tuamtuam tawh ki-at ziahziah lai hi, ki-tei ziahziah lai hi. 

Akiphuah zia pen anuai bang ahi hi:
@laigual 3 om ding
@haiku 1 ah awging 17 om ding
@laigual khatna-ah kammal awging (syllable) 5 om ding 
@laigual nihna-ah kammal awging 7 om ding
@laigual thumna-ah awging 5 mah om kik ding hi.

Haiku leeltong te pen tom thei mahmah napi-in akhiatna ngaihsun leng athute na thuk thei, na gil thei gige cih kiphawk sak hang ei. Alunglut te'n Kawllai, Manglai, Zolai tawh comment-ah na at sak ciat hun maw.

#Classylian
06/09/2021
Monday
#Khuakhaltuung_Spring

#Zomi_Haiku