Zuapa' Ni (Father's Day) hong nai ta ahihteh naupangte aading Zuapa' Ni leeltong (poem) atsak dih ni e. Naupangte'n apate uh tung ah itna alah theih nading le lungdamh akoh theih nading-in hong ki-at khia hi a, naupangte aading-in akiphuak ngiat ahihi. Naupangte' teltheih ding-in abaih theithei laimal le kammalte zong kizangh pah hi. Athulu ding-in " Ka Papa" ci ni maw. Tha na piak sak vo leh, Lawmte. Lungdam ei.
2021 kum a mah hi ei.
-
Ka Papa
**********
Itna tak tawh
Ka hih theih tawp-a
Kong at
Hiah nang a'ding
Ka lungtang pan
Ahong piang khia
Kong itna la hi e, Papa.
Ka neih lian pen
Ka Papa,
Ka lawm hoih pen
Ka Papa,
Ka muan le suan pen
Ka Papa,
Ke Ngalliam zong
Ka Papa mah.
Hih theihloh aneilo
Ka Papa,
Amuanhuai pen zong
Ka Papa,
Ahau pen zong
Ka Papa,
Ahat pen zong
Ka Papa,
Adik pen zong
Ka Papa,
Apil pen zong
Ka Papa mah.
Ka tuuk ciang
Hong phong pahpah,
Ka kah ciang
Hong delh pah a
Ka nuak ciang
Hong lungkimsak zong
Ka Papa mah.
Ka duh, ka deih
Ka kawk peuhpeuh
Ahong leisak den zong
Ka Papa mah.
Itna khut tawh
Nong tawi a,
Na anglum ah
Nong pom a,
Nui kawmsa-in
Nong no a,
Lasa kawm-in
Nong khimnate
Zaaknop lua ee, Papa.
Nong kimawl pih den a
Kimawl dan zong
Nong hilh den a
Na liangko tung
Nong tuang sak den a
Nopsa lua ing ee, Papa
Nong om pih teh
Hong lung muang sak e, Papa.
Nong kepna
Nong huaina
Nong itnate hang in
Lungdam lua ing e, Papa
Hong itlua ing e, Papa
Hong ngai lua in e, Papa.
#Classylian
16/06/2021
Wednesday
#My_Daddy
#Zomi_Leeltong
Photo credit: penguinbooks
Comments
Post a Comment