Zomi khangnote Kidop Ding Thuzaaksakna!

Zomi khangnote Kidop Ding Thuzaaksakna!

Melbourne Khuapi sung-ah upna paikhialte’ pawlzotna hong khauhpai semsem ahihmanin kidop huai mahmahna thu kipulaakkhia hi hang! Adiakin khangnote le univertity a kah (sangnaupang) khangnote in i kidop tek ding kihanthawn hang! Hih dan thute ki-at/kigen nuam masalo hi. Hita se mahleh zong, ei Zomi khangnote lakah hih dan thu hong om keuhkeuh ta ahihmanin atloh theihloh hun hong tung ta mawk hi.

Kidop kikep lahna (incapable) hang, Lai Siangtho thuthuukte theih nopna hangin tua upna paikhial (cult) pawlpi-ah a kihelkha le a lutkha ei Zomi khangno pawlkhat omkhin ta uh hi. Tua pawlpi-ah a kihel khinsa ei Zomi-te mah in ei Zomi khangnote pawlkai/pawlzawn-in hong kuan khiakhia uh hi. A min a puam uh bel kigen khia nai kei phot ni. 

Amaute sung pan hih lai a simkha a-omkhak leh, “hehpihna tawh ei Zomi khangnote’ lametna, innkuan, pawlpi, pilsinna, nuntakna te hong suksiatsak kei un”, ci-in hong thum masa nuam ing.

Hih upna paikhial pawlpi hong piankhiatna pen South Korea pan hi a, Melbourne bek-ah om hilo-in leitung bup mun tuamtuam-ah zong kizeel khin hi. South Korea ah bang pawlpi mi hauh tuak mahmah lai hi.

• City (khuasung) ah vak na hi zongin university-ah sangkah a pai na hi zongin, lamkaal-ah mi 2 (kop khat) in hong naih a, ‘Hia mun tua munah event om, lunglut huai peuhmah, nong kihel dia? Na phone number hong pia ve. Ki contact ni.”, ahihkeileh “Tua takah Bible studies om, ka lawmte’ pawlpi’ makaihna tawh akibawl hi. Free hi. Nong kihel thei dia. Mi zong tam mahmah hiven. Na phone number hong pia ve, amun leh ahun ding hong zasak kik ning.”, cih dan te hong kigen leh pelh hamtang unla na contact detail te uh pia peuhmah kei un. Mi 2 (kop khat) in a hong naih leh (atam zaw) Red Flag hi pah hi.

• Atung a mi 2 (kop khatte) tungah, ‘Hih Bible study pen kua ii makaih. Koi pawlpi ii vai hawmna ahi hiam, koi sang ii makiahna ahi hiam’, ci-in dong a hong gennop kei leh (ahihkeileh) “ka lawmte’ pawlpi ii makiah hi, ken zong thei lua keng”, ci-a hong dawnkik leh Red Flag hi pah hi.

• South Korea pan hong kipat khiatna tawh kizui-in Lai Siangtho hong hilhte Siate pen Korea minamte mah na hi ding hi. Mangpau (English tawh) hong hilh ding hi. Hih pen (atam zaw) Red Flag hi pah hi. Hih munah theih ding (Korea khempeuh cihna hipah lo hi).

• Tua Bible study ah a paipai sa na hihleh, tua Bible study a makai pawlpi ahihkeileh a makai sang te dong lecin, hong kigen nuamlo hi ding. Ahang in a pawlpi min uh kithei leh internet ah kizong pah ding a lauhna hang uh ahi hi. Kizong leh lah a kel lu phum uh hong kilang ding alauh man uh ahi hi.

• Theih behnop a om leh online ah kizong thei hi. Tua pawlpi pen - Shincheonji Church of Jesus (SCJ), the Temple of the Tabernacle of the Testimony, ahihkeileh Shincheonji. Hih min 3 te tawh kithei a, hih keywords te tawh zong lecin thu tampi tak na mu kha ding hi. Min dangte- Mount Zion, New Heavens and New Earth- cih bang ahi hi. Lee Man-hee in South Korea-ah 14 March 1984 kum-in hih pawlpi a na phuh ahi hi.

• A makaipipa le a phuankhiapa’ min pen Lee Man-hee (Man-Hee Lee, Lee Man-Hee, or Manhee Lee) hi. A kum 91 bang hita a, a mah leh amah, “Kei pen Messiah hi ing, Topa Zeisu a 2 veina hong pai khinta a, kei pen Second Coming of Jesus hi ing. Revelation (Mangmuhna/Kilaakna) pen kei longal kua mah in akhiatna a man taktak hong gen theilo hi. Gupna ngah nading kei nong up ding uh kisam hi”, ci-a akipulaak ngampa ahi hi. A nung zuite in a sitheilo (anungta tawntung ding hi) ci-a um  lai uh hi.

• Atawm pen Gam 12 ah kizel khin zo ta a tuate lakah USA, Australia, New Zealand, England Gamte kihel hi.

-

Deihsakna

• Ahihtheih lai teng ih theih pawlpite’ makaih Bible studies ahihkeileh ih pawlpi’ makaih Bible study longal vapai-a va kihel loh ding hoih zaw ding hi.

• Lai Siangtho thuthuuk i theihnop leh Lai Siangtho Sang tam mahmah hi. LST thuthuuk ih theihnop taktak leh tua free Bible studies te saang LST sangte mah ah kah ding kihanthawn hang.

At nop tampi tak tawh khawl bawl phot dih ni! Zom toto zel ni ei! Hehpihna tawh leitung bup in theih dingin na share sak sawnsawn un maw. Lungdam ei.