Tuunnu' Ni (Mother's Day)
May 14 2023
Tuni Tuunnu' Ni (Mother's Day) ahih manin ka "Tuunnu" le leitunga om "Nu" a kici khempeuh tung ah "Happy Mother's Day" ci-in hong muak masa nuam ing. Hih bang hun ciang i piankhiatna i nute mah kiphawk hi. Khenkhatte' aadingin lungdamna, nuamna, kipaakna, le angtanna te tawh kidimin a om tei hangin, khenkhatte' aadingin gamlapi-a om a nute uh phawkna, le a phamsa a nute uh phawkna-in khitui luanga lungzuang khuangai-in ki-om thei zel hi.
A diakin hih hunte ah a phamsa Nute phawkin a dah, a kap, a lungleng, a khua-ngai khempeuhte tungah Topa' Khasiangtho in hong hehnepsak henla, Pasian in hong nusia ngeilo, hong ompih den, a mit nauta bang hong kem den a, i nute'n thangvan pan eite' aading thu hong nget saksak den hi ci-in i phawk ding lunggulh hang.
Topa' hehpihna tawh tuciang hong dampih lai, hong nuntakpih lai i nute khasiasak lo a, hong dampih lai, hong nuntakpih lai ahihmanin i Topa Pasian tungah lungdamko hang. Cidam, khansau-in kum tampi tak hong dampih hong nuntakpih lai dingin Sian in hong siam ta hen!
Tuni Mother's Day (Tuunnu' Ni) tawh a kituak dingin a thulu dingin *Ka Tuunnu* ci ni maw. Hih *Ka Tuunnu* cih leeltong (poem) tawh ka Nu le leitung buppi-a Nu a kici khempeuh tungah lungdamko kawmin pahtawina kong pia hi. *Nu* a kici khempeuh tungah "Lungdam Tuunnu' Ni" maw!
2021 a poem mah zangh kik dih ni e. Nasim sak zel dih vo lawmte.
-
Ka Tuunnu
************
Lailung' thuakna
Lungkham singimnate
A hong theisiampen
Mimbang pianna
Ka sen Tuunnu hi e.
Lailung' zaitha
Patpuan bang hong nem a
Kha kunkun-in
Ka om niloh ciang
Sinlai-a dahna meiilompi
A hong thengsak
Zaitha thak
A hong guan zong
Ka Tuunnu mah hi e.
Simlei' gawtna tuamtuam
Thuakkha mahleh
Lungkialo nungkiklo
A votawite tung
Mongneilo itna tawh
A itna kipte
Hong lakkhia veve.
Mualliam cih om ngeilo
Nong itna
Lungdam luatna tawh
Khukdin-in
Sumbang hong bia ung e
Itluat Tuunnu.
Tung thangvan a
Ataang solkhapi saang
Ka Tuunnu' sakmel mah
Ngaihbaang-in etlawm pen e.
A khum ngaungau
Khuaizu saang
A ngaih ngaungau
Aw namkimte saang
Ka Tuunnu' itna tong nem mah
Khum zungzungin zaaknop pen e.
Hih simlei-ah
Khankum sawt
Guabang hingin
Taangbang adam ding
Sian in hong siam henla
Lungdeih teng libang acing ding
Sian in lumbang hong sung tahen!
#Classylian
Sunday
09/05/2021
@11:40 am
#HappyMothersDay
#TuunnuNi
#အမေများအားလုံးချမ်းမြေ့ပါစေ
#Zomi_Leeltong
#MyMommy
Comments
Post a Comment